კობა შათირიშვილი - "ის"
ტექსტის ზომა:
პირველ რიგში გეტყვით, რომ ის ნამდვილი, ხორცშესხმული არსებაა ისეთივე როგორიც მე და თქვენ, ოღონდ არა ისეთი, როგორიც შეიძლება ამ ჩანახატის კითხვისას წარმოიდგინოთ. არა, ის სულ სხვაა. ის სხა რომელიც მხოლოდ სიზმარში შეიძლება იხილოს ადამიანმა. სიზმარში, რადგან ხელშეუხებელია და მიუწვდომელი. ის ისაა, ვინც შეიძლება მთლიანად წაგართვას ცხოვრება, იმედები და დაგაკარგვინოს რწმენა. ხანდახან ვფიქრობ, ამას შეიძლება იმიტომ აკეთებდეს, რომ შენს ცხოვრებაში მარტო მისთვის დარჩეს ადგილი და მთლიანად დაეუფლოს შენს სამყაროს. მაგრამ - ამის მიუხედავად ის მაინც ისაა. "ის" არასოდესაა მარადიული, მაგრამ მისდამი ლტოლვა არასოდეს ილევა, არცერთ ეპოქასა თუ სამყაროში. ის ყოვლისშემძლეა. დგება დრო, როდესაც შენი ცხოვრება მთლიანად ხდება მასზე დამოკიდებული და გიპყრობს შიში. შიში იმისა, რომ ოდესღაც შეიძლება დაგტოვოს. ადამიანს ყოველთვის აკვირვებდა, თუ რატომ ტოვებენ ისინი, ვინც მათსავე მოსაპოვებლად ყველაფერი დათმო. ის სხვა შემთხვევაა. ის ისაა, ვინც იცის, რომ ასეც უნდა მოხდეს, რადგან მასთან სიახლოვე მხოლოდ ყველანაირ ფასს უკარგავს მის სიდიადეს. ოდესღაც ის შენთვის ყველაფრის საწყისი ხდება. ყველაფრის ამქვეყნიურისა თუ არაამქვეყნიურის. ის დასაბამია სიკეთისა და ბოროტების ერთნაირად. თუ მასში სიკეთეს დაინახავ შენც სიკეთე ხდები და სამყაროც, ხოლო თუ ბოროტება . . . ის ძალაა მამოძრავებელი და სიცოცხლის წყარო. ზოგჯერ მგონია, რომ მთელი სამყარო მასშია, რადგან მასში ყველაფრის პოვნა შეიძლება. მასში იპოვით ბედნიერებას, სიყვარულს, სიკეთეს. მხოლოდ იმას, რასაც ეძებთ . . .
კობა შათირიშვილი
კობა შათირიშვილი
