ნანა სელეპანოვა - ჩემო თაფლისფერ თოლებავ
ტექსტის ზომა:
ჩემო თაფლისფერ თოლებავ,
შემოფეთებავ მზისაო,
სულს ჩარჩენილო ოცნებავ,
გამთენებელო დღისაო.
მთლად ჩამოიქცეს ანდები
მე თუ შენამცა მძულდეო,
მოდი და შენი განცდები
გადამაყარე გულზეო.
გადმოხეთქილხარ მდინარედ,
კალაპოტს ასცდი მთაზეო,
თავს დაგადგები მძინარეს,
თუ არ შემომხვდი გზაზეო.
ეჭვები, თუკი აჯანყდნენ,
ჯავშანს მოვიცვამ ტანზეო,
ამაღამ მეფედ დაგაჯენ
საგვარეულო ტახტზეო.
მზე დაიშალა ისრებად,
მშვილდი მოზიდა მხრებზეო,
ვნება ასხმული მძივებად
ჩამოიკიდა ყელზეო.
ხან გაფრენილო უბიდან,
ხან დაფენილო მკერდზეო,
ჩემი შეშლილი გულია,
შეყვარებული შენზეო.
