უფალო, ამ ქვეყნად რამდენი ჭორია - ქეთი ალასანია

უფალო, ამ ქვეყნად რამდენი ჭორია,
მართალი გამხდარა ტყუილის სამიზნე,
სამართალს აკრავენ ჯვარზე და ჰგონიათ,
ვერავინ მიხვდება გულში რა ჩაიდეს.
რა გითხრა, შენც ხედავ ფარული ომია,
აქ შენი სახელით სამსხვერპლო აგვიგეს,
ეშმას საამებლად ხელებზე კოცნიან,
ისინი, ვინც გროშად სულები გაჰყიდეს.
ვეცემით უფალო და ასე მგონია,
ეს ყოფა წააგავს არეულ საგიჟეთს,
აქ სიყვარულის წილ სიძულვილს წონიან,
რომელსაც ჩვენს შორის ვიღაცა არიგებს.
ჭაობში ვეფლობით, ხსნის გზა კი შორია,
თავს ვერსად ვაფარებთ, ტაძარი წაბილწეს,
შენ დაგვრჩი იმედად, სხვა არც ვინ გვყოლია,
არ დაგვთმო უფალო, ხელებს ნუ გაგვიშვებ.
უშენოდ უფალო აქ ყველგან შფოთია,
მოგვხედე და შენი წყალობა გაიღე,
ის ძალა მოგვეცი, რაც ჯერ არ გვქონია,
რომ დავცეთ ისინი ვინც გულზე გვაბიჯებს.
დრო დადგა ერთობის, ეს ჩვენი ომია,
ვიბრძოლოთ მიწისთვის ფეხქვეშ რომ გაიგდეს,
ჩვენია სამშობლო საკუთრად რომ თვლიან,
შეფხიზლდით, სანამ დრო უკუსვლას დაიწყებს.

ქეთი ალასანია