დავით დეფი დაიბადა ქალაქ თბილისში 1968 წლის 21 ივნისს. დაამთავრა თბილისის პირველი ექსპერიმენტული სკოლა, 1992 წელს დაამთავრა თბილისის სახელმწიფო სამხატვრო აკადემია, არქიტექტურის ფაკულტეტი. უმაღლესი სასწავლებლის დამთავრების შემდეგ მუშაობდა მასობრივი ინფორმაციის სხვადასხვა საშუალებებში: გაზეთები, რადიო, ტელევიზია. ტელეკომპანია „მეორე არხში“ დაარსა ორიგინალური საავტორო მედიაპროექტი „მზეRA“. 1995 წლიდან 2000 წლამდე თანამშრომლობდა ცნობილ რეჟისორებთან ოთარ იოსელიანთან და ნანა ჯორჯაძესთან. არის მთელი რიგი პოეტური პერფორმანსებისა და აქციების სულისჩამდგმელი და მონაწილე. „ვარდების რევოლუციის“ დროს იყო დაუმორჩილებლობის მოძრაობის ერთერთი ლიდერი. 2004 წლის 21 მაისს დაარსა XXI საუკუნის პირველი ქართული პოეტური ორდენი „სამკაული“. განახორციელა ოთხნაწილიანი პოეტური აქცია „ოთხი სტიქია“, გამოიცა წიგნი „სამკაული“ და ორნაწილიანი აუდიოალბომი „ამიშვი ცამდე“. რუსული ინტერვენციის დროს ჩაეწერა მოხალისეთა არმიაში, დაარსა სამოქალაქო სოლიდარობის შტაბი და არის ცნობილი სლოგანისა და მოძრაობის „STOP RUSSIA“ ავტორი. 2008 წელს ლვოვის საერთაშორისო ლიტერატურულ ფესტივალზე განახორციელა პოეტური პროექტი „ობსერვატორია“, სადაც თავის ლექსებში პირველმა გამოიყენა კვადროფონია ვიზუალურ წარმოდგენასთან ერთად. 2010 წელს გამოვიდა მისი პოეზიის აუდიო–ალბომი "დაფიონი SUPERNOVA DOMINE", რომელიც ქართველი და უცხოელი კრიტიკოსების მიერ შეფასდა, როგორც პირველი ხმა ახალ პოეზიაში.
პროზა
ლიტერატურული ნაწარმოებების შექმნა 25 წლის ასაკში დაიწყო. ერთდროულად პროზა და პოეზია. ინსპირირება მიიღო ედგარ ალან პოსგან. 1994 წელს გამოაქვეყნა ესეების კრებული „მკვდარი დრო“, რომელიც შეეხებოდა ადამიანის ბედს იმდროინდელ მსოფლიოში. წიგნი შედგება ციტატებით ბიბლიიდან და მოიცავს ადამიანის ქცევის ფსიქოლოგიურ ასპექტებს. 2000 წელს გამოდის დიალოგების ორიგინალური კრებული „P. S.“ — დიალოგები წიგნის გმირებთან, მათი ბედი ავტორიზირებულ ტექსტში. 2003 წლიდან ზედიზედ ქვეყნდება მისი სამი რომანი: „ჩემმა ტყუპისცალმა მიპოვნოს“, „დეკემბრის თილისმა“, „დილა სასაწაულების წინ“. რომანი „ჩემმა ტყუპისცალმა მიპოვნოს“ ითარგმნა გერმანულ ენაზე. 2007 წელს გამოიცა დეფის მიერ შესრულებული თარგმანი ხალილ ჯიბრანის „წინასწარმეტყველისა“, ხოლო 2008 წელს გამოდის მისი ფუნდამენტური ნამუშევარი, რომანი „დემნა გედევანიშვილი“, ორნაწილიანი რომანი პროლოგითა და ეპილოგით და გაგრძელებით ინტერნეტში, რაც ათავისუფლებს ტექსტს ყდაში ჩასმული ჩარჩოებისგან. ეს არის „ამბავი კაცისა, ვისაც უყვარდა, სწამდა და ჰქონდა იმედი“.
პოეზია
2003 წელს გამოიცა ლექსების წიგნი „ზურმუხტი და საფირონი“. 2004 წლიდან ქვეყნდება მისი პოეტური ტრილოგია „დაიქცა“, რომელიც მოიცავს სამ დამოუკიდებელ წიგნს: „და“, „იქ“, „ცა“. 2006 წელს გამოიცა ლექსების კრებული „სამკაული“ და აუდიოალბომი „ამიშვი ცამდე“, რომელიც ახალი თაობისთვის საკულტო მოვლენად იქცა და ჩატარდა რიტუალური აქციები დიდგორის ველზე („სტიქია ცეცხლი“), სადაც დაიწვა ორდენის პოეზია. მას მოყვა მეორე აქცია: „სტიქია მიწა“ — სამების საკათედრო ტაძართან ორდენს გამოეყო მიწის მცირედი ნაკვეთი, სადაც დაირგა ბროწეულის ხე და მის ფესვებში ჩაიდო ორდენის ლექსები. „სტიქია წყალი“ — სამკაული ნავებით გავიდა ზღვაში, სადაც ჩატარდა პოეტური პერფორმენსი და ბოთლებში ჩადებული ლექსები მიეცა წყალს. სამკაულისგან განცალკევებით დეფიმ შექმნა ახალი პროექტი „High Definition“, რომელიც მოიცავს მისი პოეზიის აუდიო და ვიდეო ალბომს სახელწოდებით „დაფიონი — Super Nova Domine“. მისი ნაწილი, სახელწოდებით „ობსერვატორია“, 2008 წელს ქალაქ ლვოვში გამართულ პოეზიის საერთაშორისო ფესტივალზე იქნა წარმოდგენილი და უკრაინული მედიის მიერ უაღრესად პოზიტიურად შეფასდა.
კინოროლები
წამყვანი როლი მარინა კულუმბეგაშვილისა და მამუკა ბერიკას ფილმში „მანდალა“ (1993). წამყვანი როლი ოთარ იოსელიანის ფილმში „ყაჩაღები — თავი VII“, ჟიურის სპეციალური გრანპრი ვენეციის კინოფესტივალზე (1997), ერთ-ერთი მთავარი როლი ნანა ჯორჯაძის ფილმში „27 დაკარგული კოცნა“ (2000). როლი ზინოვი როიზმანის ფილმში „დრონგო“.
×