ნოდარ დუმბაძე - ღამე მთებში

nodar dumbadze game mtebshi dumbadze nodar sabavshvo leqsi leqsebi bavshvebistvis leqsebi patarebistvis
ჩამსხვრეულიყო ხევი მთების უღრან უბეში,
დათვის დანატორ ბედაურის ხერხემალივით,
ვარსკვლავებს მთვარე გადაჰქონდათ ქერა ღრუბლებში
გულშეღონებულ, გატაცებულ თამარქალივით.
ბებერი მუხა რძისფერ ჯანღით გალეშილიყო
და ქარტეხილზე ბარბაცებდა მთვრალი დევივით,
გიჟი ჩანჩქერი ნაპრალებზე ჩამოშლილიყო,
ზღაპრული ალის ალმოდებულ ნაწნავებივით.
მაღლა ვარსკვლავნი კიაფობდნენ ათასფერადად,
მუქ ლურჯ ზეწარზე ოქროს ზოლად გადაღვრილები,
თითქოს მეომრებს ნაბადები გადაეყარათ,
ისე ეყარნენ მთვარის შუქზე მთების ჩრდილები...
და იყო ღამე საოცარი შესახედავი,
კავკასიონზე ფრთამოკეცილ ღამეს ეძინა,
ეძინათ მთებსაც, არ ეძინათ მხოლოდ ვარსკვლავებს,
რომ მშვიდი ღამე თავდასხმისგან გადაერჩინათ.