არა ვარ მე შენზე ნაწყენი

არა ვარ მე შენზე ნაწყენი,
ღმერთია მოწამე,
უბრალოდ ეჭვებმა შემშალეს,
ეჭვებმა მომწამლეს...
არ ვიცი ახლა რა მიშველის,
არ ვიცი რა გიყო...
სჯობია შევრიგდეთ, კამათი
არავინ გაგვიგოს...
თუმცა კი არ არის საშველი,
ვერ გამოვსწორდები,
როცა კი, ღვთის ნებით, ახლოს ვართ,
მე მაშინ გშორდები...
და მგონი ასეთად დავრჩები
სამარის მიწამდე...
რა მოხდა, ასეთი მიმიღე,
ასეთი მიწამე...
არა ვარ მე შენზე ნაწყენი,
ღმერთია მოწამე,
უბრალოდ ეჭვებმა შემშალეს,
ეჭვებმა მომწამლეს.
ხომ იცი, არ მსურდა გვეჩხუბა,
ეს ერთიც შემინდე,
თუ გინდა ხვალ კიდევ ვიჩხუბოთ.
ოღონდ დღეს - შევრიგდეთ...