ერისთავი გიორგი

რეცეპტი

ოდეს ჭაბუკა ქალსა გული უწუხდებოდეს,
სიცხე რომ არა ჰქონდეს და ისრე სუსტდებოდეს,
მაშინ მისი მკურნალი
არის ესე წამალი:
მოიყვანეთ ჭაბუკი, იყოს კარგი ტანადი,
ყმაწვილი, ჩინოვნიკი, მთავარი, გინდ თავადი.
რა იხილოს მან ქალი,მწოლარე სარეცელსა,
მოვიდეს მოკრძალებით, გულზე იდებდეს ხელსა,
დაიჩოქოს ცალ მუხლზედ, დიდხანს იყოს მდუმარე,
თვალთ ცრემლი გაუბრწყინდეს, შექმნას მან ოხვრა მწარე;
მერე უთხრას ხმა ნაზით: გეტრფი, გეტრფი და გეტრფი!...

ნახეთ, თუ ამ სიტყვებით ქალს ფერი მისცემოდეს,
ისე გულს აქ აქშენდეს, ხანდისხან ღამდებოდეს.
მაშინ ქალსა და ყრმასა მყის გადასწერეთ ჯვარი,
თვარა სხვაგვარ წამლობით იქნება მალე მკვდარი.

ერთი კაცი წვა სნეული

ერთი კაცი წვა სნეული, თითქმის რომ სული ხდებოდა,
თავს უჯდა ცოლი ყმაწვილი, ჰსტიროდა, ზედ აკვდებოდა.
ცოლს უთხრა მომაკვდავის ხმით: ''ადე და დახურე კარი.
მოდი, აქ დაჯექ, ხო ვკვდები, მაშ ჭეშმარიტად მითხარი:
ჩემმა ტოლებმა ჩხუბშია წამომაყვედრეს, ვითომცა
ფილიპემ სეირნობაში სამჯერ ტუჩებში გაკოცა.
ნუ ჩამაყოლებ ჯავრათა, მართლა ხო არა გყვარობდა?
იქნებ გაცდინა და მისთვის ისრე გულითა ხარობდა?''
ცოლმა მიუგო წუწუნით: ''მე სწორედ გაგიტყდებოდი,
თუ რომ ვიცოდე, რომ ეხლა უთუოდ შენ მოჰკვდებოდი".