თუ თავს იკავებ

თუ თავს იკავებ და არ იბნევი,
თან რწმენასა გგვრის შენი ღირსება,
აუღელვებლად ლოდინს არ იმჩნევ
და გული შენი მართლით ივსება,
სხვისთვის არა ხარ ავი სამიზნე,
წმინდანად ყოფნა არ გაქვს თვისებად.
როცა საკუთარ ფიქრებს ერევი
და ის არ ხდება შენი მიზანი,
წარმატების და უბედურების _
ორივესი ხარ მხოლოდ ხიზანი.
და თუ აიტან თაღლითის მიერ
მართალი სიტყვის შეცვლას ველურად
და დიდი მარცხის დათმენის შემდეგ
ძალებს აღიდგენ უწინდებურად.
თუ შეგიძლია, რაც იყო უწინ,
ის ალალბედზე თავქვე დააწყო,
წაგებულ საქმეს არ გაეტირო
და ახლებურად ისევ ააწყო.
შენი ნერვები, გული და ძარღვი
რომ იყოს შენი სწრაფვის სამაგრი,
ძალ-ღონის დაცლა არ შეიმჩნიო,
თავს შეუძახე მედგრად: „გამაგრდი“!
თუ ბრბოში ცდილობ ღირსების დაცვას,
მეფესთან ერთად არ კარგავ იერს,
თუ სხვისი აზრი გათბობს სხივებად,
მაგრამ ესწრაფვი, მისდიო ძლიერს.
და თუ დაიწყებ მანძილის ზომვას,
არ მიაყენო არვის ზიანი,
ეს დედამიწა იქნება შენი
და შენ კი _ ღირსი ადამიანი!

რადიარდ კიპლინგი
(თარგმნა თათულიმ)