სულის სიმფონია

ჩამოაყოლე ხელი ჩემი სულის
კლავიშებს,
რომ დავრთო ნება სიყვარულმა
ჩემშიც იგიჟოს,
გამთენიამდე ვნების ცეცხლი
თავს თუ აიშვებს,
დაგმორჩილდება, როგორც ჩემი
გრძნობის დირიჟორს.
ლამპიონების შუქი ადგას
აშლილ სარეცელს,
ვიდრე თამამი გამოხედვით
სულ შემზარავდე,
შავ კლავიშებზე გულწასული
ვიდრე დაეცეს,
თეთრი თითები...
ააკვნესე სულზე მანამდე.
სიჩუმის ჰანგი შეაფხიზლებს
ტირიფის ტოტებს,
შენ გაიოცებ,
თუ იქნები ნეტავ გულწრფელი?
სანამ დაწერ და ააკვნესებ
ცრემლიან ნოტებს,
მოდი და სულის კლავიშებზე
შემახე ხელი.

ნანა მეფარიშვილი