გადამდგარი სტენოგრაფისტის სიზმრები
(gadamdgari stenografistis sizmrebi)
(gadamdgari stenografistis sizmrebi)
გამარჯობა, ბიძია გრიშა,
დამაძინე, ბიძია გრიშა.
ნუ აზუზუნებ შენს ბულგრაფს და
ნუ აპრიალებ მანქანას, რომელიც
უკვე ათასჯერ გააპრიალეს დუნაის გაღმა.
შენ ხომ მას მაინც ვერ გაყიდი.
(სიბრძნე მეზობლისა)
როგორ გაფრინდნენ ლუდის ბოთლები სტენოგრაფისტის ფერადი სიზმრიდან და როგორ შეფრინდნენ ჰალსტუხიანი პროკურორის სიზმრებში, რომელიც საერთოდ არ სვამდა ლუდს
თავმა და ჭერმა ტრიალი შეწყვიტეს. მოხუც სტენოგრაფისტს ტკბილად ჩაეძინა. პენიცილინის უიშვიათესი სახეობით მოპირკეთებულ ფეხის ფრჩხილზე ბუზი დამჯდარიყო და ფირუზისფერი თვალები ჭერისთვის მიეპყრო - თავის თანამოძმეებს უყურებდა დაჟინებით. შემდეგ მდებარეობა შეიცვალა, რამაც სტენოგრაფისტის ჯერ კიდევ მოქმედი რეფლექსები აამუშავა და ბუზი დივანის გვერდზე მდგარ სკამზე იქნა კატაპულტირებული.
მწერმა არ შეიმჩნია დარტყმა, პენიცილინის ნარჩენები მშვიდად ჩამოიბერტყა და პურის ნამცეცებისკენ აიღო გეზი. ზეიკიძის ძეხვის ნაფცქვენები მოძმე ჭიანჭველებს აეთვისებინათ, ობოლი ტარაკანა, რომელსაც სტენოგრაფისტმა ფრიდრიხ ბარბაროსა შეარქვა, მაგიდის კუთხეში იჯდა მოწყენილი და ულვაშებს ნავის ნიჩბებივით ამოძრავებდა.
სტენოგრაფისტი ყოველთვის უცნაურ, და რაც მთავარია, წინასწარმეტყველურ სიზმრებს ხედავდა. ყოველ შემთხვევაში, მეზობლები ასე ეუბნებოდნენ.
სიზმრების ძირითადი თემა ალკოჰოლის მორიგი რაოდენობის მოპოვება იყო და მისი ყოველი დღეც ამით იწყებოდა და ამითივე მთავრდებოდა.
იმ ღამეს, სტენოგრაფისტმა სხვა სიზმრებთან შედარებით, უცნაური რამ ნახა: მისკენ ორი ყუთი ბავარიული ლუდი მოფრინავდა. ყუთებიდან ბოთლები ცვიოდნენ, ჰაერში სამ ბრუნს აკეთებდნენ და ისევ ყუთში ბრუნდებოდნენ. მერე ისევ ხტებოდნენ ყუთებიდან და მეზობლად მცხოვრები ჰალსტუხიანი პროკურორის ფანჯარაში იმალებოდნენ.
- ჰიტლერ, გებელს, ევა ბრაუნ, დაგვნებდით! - გაჰკიოდნენ რაიხსტაგში შესული კომუნისტები.
- ა-ა-ა-რააა!!! - პასუხობდნენ ჰიტლერი, გებელსი და ევა ბრაუნი.
ჰალსტუხიანი პროკურორის სიზმრები
ჰალსტუხიანი პროკურორი სიზმრებს იშვიათად ხედავდა. რასაც ხედავდა, ისიც სხვადასხვა წარმომავლობის სარჩელებით, საჩივრებითა და განაჩენებით იყო დაკომპლექტებული. იმ ღამეს პროკურორს ლუდის ბოთლები დაესიზმრა და გაიღვიძა თუ არა, სახლიდან გავიდა. პროკურორი ერთი კვირის მერე იპოვნეს წყალსადენის თხრილში, ხელში ლუდის ბოთლი ეჭირა და ნიკარაგუის ჰიმნს ღიღინებდა.
ზურა
ზურა საწოლში იწვა და ყელი სტკიოდა. ნათურა კი პირდაპირ თვალებში ანათებდა. სახლშიც არავინ იყო, ნათურა რომ ჩაექრო.
თომას ალვა ედისონი
ედისონს შიდაწვის ძრავა არ გამოუგონებია. ედისონმა სპირალიანი ნათურა გამოიგონა.
კომუნისტები
კომუნისტებმა ედისონის ნათურა გადანათლეს და ილიჩის ნათურა უწოდეს.
ილიჩი
იმ უხსოვარ დროს, როცა სტენოგრაფისტის ბებია ჯერ კიდევ ცოცხალი იყო, ხშირად ყვებოდა ამბებს იმის შესახებ, თუ როგორ უყვარდა ლენინს ბავშვები, როგორ იპარსავდა წვერს ლენინი და როგორ არ გამოჭრა სამართებლით ყელი სააბაზანოში შესულ პატარა სეროჟას, როგორ ჩუქნიდა ბავშვებს მურაბიან ქილებს და როგორი ენთუზიაზმით დადიოდა პიონერების გვერდით წითელხელსახვევშებმული.
ბავშვები
ბავშვები ეზოში იყვნენ და რეზინობანას თამაშობდნენ.
იმ დროს ევა ბრაუნის, ჰიტლერისა და გებელსის ამბავი ჯერ არ მომხდარიყო.
ევა ბრაუნი
ევა ბრაუნი ნოიშვანშტაინის სასახლის ეზოში გაჭიმულ ჰამაკში იწვა, ჩერჩილის დატოვებულ სიგარას აბოლებდა და ჩეხურ ლუდს სვამდა, ბოთლებს კი პირდაპირ ჰაერში ისროდა. ცალი ფეხი ჰამაკიდან გადმოეყო, დროგამოშვებით მიწას დაჰკრავდა ხოლმე და ჰამაკს აქანავებდა. ეზოს ჭიშკართან ობლად ამოსულ არაუკარიის ხეზე კი ბავარიული შაშვი შემომჯდარიყო და საბჭოთა ორთქლმავლებზე გალობდა.
”დაჟანგულან საბჭოთა ორთქლმავლები
ნახშირის ქვაბიც გასკდა
და მემანქანეც მთვრალია”
ასე გალობდა შაშვი საბჭოთა ორთქლმავლებზე. ევა ბრაუნი ბედნიერი იყო.
საბჭოთა ორთქლმავლები და სამხედრო ქარხანად გადაკეთებული საკონსერვო ფაბრიკა
ეფრეიტორ მიასოედოვის სანგარში ბნელოდა. მართალია, ღამე იყო და ყველა სანგარში ბნელოდა, (თუ არ ჩავთვლით იმ სანგრებს, რომლებიც იამაიკაზე და პოლინეზიის კუნძულებზე იყო გათხრილი) მაგრამ მიასოედოვის სანგარში განსაკუთრებული სიბნელე იყო. ჯარისკაცები ვარშავიდან წამოღებული ჩექმების ბაკუნის პარალელურად, ხიშტებით საკუთარ ქამრებს ანაკუწებდნენ, მერე ავოტმატის ლულაში ტენიდნენ და სულის ჩაბერვით ესროდნენ სამიზნეს, რომელიც თავისი არსით პაპიროს ”ბელომორის” ცარიელ და მრავალგზის დაჭმუჭნულ კოლოფს წარმოადგენდა.
- გენოსე ეფრეიტორ, გენოსე ეფრეიტორ! მომაქციეთ ყურადღება! - მსროლელი ა.ვ. სტუპკა განწირული ხმით კიოდა - გენოსე ეფრეიტორ, მომხედეთ!
- ტავარიშჩ! ასე უნდა მომმართო ხოლმე! - მშვიდად მიუგო მსროლელ ა.ვ. სტუპკას მისი გერმანული ენის ცოდნით უკმაყოფილო ეფრეიტორმა და მაიონეზიანი სალათის ჭამა განაგრძო.
სტუპკას ხელში რკინის ცილინდრი ეჭირა, რომელსაც ერთ მხარეზე მუხუდოს მარცვლები ეხატა, მეორეზე კი მარინადში ჩადებული სარდინები კიაფობდნენ.
ჯარისკაცებმა ქამრის ნაკუწების სროლა შეწყვიტეს და სტუპკას მიაშტერდნენ.
ნოიშვანშტაინის ციხესიმაგრეში აფეთქების ხმა გაისმა. ევა ბრაუნმა მშვიდად მოქაჩა სიგარა, ლუდის უკანასკნელი ბოთლიც გამოცალა და ცაში მოისროლა.
მემანქანე და წვერგაუპარსავი თანაშემწე კი ნახშირს უმატებდნენ ორთქლმავალს და ციმბირულ სიმღერებს მღეროდნენ.
დიდი გამოღვიძება და ამაყი მეზობლები
სტენოგრაფისტის კარზე კაკუნი გაისმა. სტენოგრაფისტმა საბეჭდი მანქანა ”ანდერვუდის” კლავიატურით მოსვირინგებული ხელით თავი მოიფხანა, უმისამართოდ შეიგინა და კარის გასაღებად წამოდგა.
კატაპულტირებული ბუზი კარის სახელურზე ჩამომჯდარიყო, ზეიკიძის ძეხვის ნაფცქვენები ჭიანჭველებს წაეღოთ, ხოლო ზარმაცი ტარაკანა კი კვლავ მაგიდის კუთხეში იჯდა გაუნძრევლად. ამაყი მეზობლები კი მანქანებს აპრიალებდნენ.
გრიშა ბიძია, გაყიდე მანქანა?
(სიბრძნე მეზობლისა, იგინივე და დაღლილი გრიშა)
2008.09.15