აინშტაინის ტვინს გამოფენაზე გაიტანენ

გამოფენა, რომლის ექსპონანტებს შორის აინშტაინის ტვინის ნაწილიცაა, დღეს ლონდონში, გალერეა Wellcome Collection–ში, გაიხსნება.

აინშტაინის ტვინის ნაწილს დიდ ბრიტანეთში პირველად გამოფენენ. გარდაცვალების შემდეგ, 1955 წელს, მეცნიერის სხეულს, მისვე სურვლისამებრ, კრემაცია ჩაუტარდა. მაგრამ ტვინი არ დაწვეს – როგორც პათოლოგმა ტომას ჰარვიმ განაცხადა, გენიოსის ვაჟმა ტვინის შენახვის ნება დართო, მისი შესწავლის მიზნით.

ტვინი, რომელიც ბევრის გასაკვირად, არცთუ ისე დიდი აღმოჩნდა, 240 ნაწილად დაშალეს და ჰარვის სახლში ფორმალდეჰიდით სავსე ქილებში ინახებოდა. ფრაგმენტების ნაწილი პათოლოგმა კოლეგას, უილიამ ერიცს, მისცა. რომელმაც, შემდგომ, ფილადელფიის მუზეუმ Mutter Museum–ს გადასცა.

მუზეუმში მეცნიერის ტვინი პირველად გასულ წელს გამოფინეს. ახლა კი ფრაგმენტები ლონდონის გამოფენისათვის „ითხოვეს“.

გამოფენაზე ასევე გამოტანილი იქნება ცნობილი მკვლელის, ედვარდ რულოფის ტვინის ნაწილი. მან სასიკვდილოდ სცემა მეუღლესა და შვილს, მოწამლა ნახევარდა და დიშვილი. მაგრამ არასაკმარისი მტკიცებულებების გამო, ციხიდან გამოუშვეს.

რულოფი ასევე ცნობილი ფილოლოგი იყო. და მაშინ, როდესაც 1871 წელს მაღაზიის თანამშრომლის მკვლელობისათვის სიკვდილით უნდა დაესაჯათ, ზოგიერთმა თანამედროვემ მისთვის სიცოცხლის შენარჩუნება მოითხოვა, რათა მეცნიერული კვლევები განეგრძო.

ედვარდ რულოფის ტვინი დღემდე ყველაზე დიდად ითვლება მსოფლიოში.