გიორგი ბუნდოვანი - ხსოვნის ტბა

giorgi bundovani - xsovnis tba
თეთრი მუხტი, წითელი ტბა, ხრიოკი გზა,
პარალელები უთვისტომო განზომილებით.
არარსებული ნარცისიზმის იმიტირებით,
განმეორდება უვარსკვლავოდ ტირანი ცა.
არის ავდარი, მოდრეკილი ჩაჩოქვით, ნაზად
შემოპარული მანკიერი თვითაღსარება,
წითელი ტბების უჰაერო გარდაცვალება,
დარჩება სივრცე, უბგერებო სიყრუით - სახტად.
სასომიხდილი გუნდრუკთცემა, კმევა თუ ფარსი
ძალ-ღონით სავსე ნაკლოვანი, მშრალი კოსმოსი.
ტანთშეფენილი, ობიანი, წმინდა სამოსი
მცველი აურის, დარაჯივით ფხიზელი გარსი,
მოსხლეტილ წნულებს და კუნჭულებს უღრანი არსის
შემოგარენში მიმოფანტვა სენთა კრებულის -
მიძღვნა ტრიადის, ვიღაცისთვის, აღამატებულის
მიძღვნა ლაქლაქის, დატკბილულის და მასლაათის.
მუხტი -ფერმკრთალი, ტბა -წითელა, გზა -კრატერული
და მარცხი მჩატე, როგორც მძიმე სასახლე მხრებზე.
სისხლი-მელანი, როგორც ტატუ ნაივურ მერხზე,
სისხლი-მირონი -ავ ღამეში, განათებული…

2008