ნოდარ დუმბაძე - ბაღში

nodar dumbadze galaktion bagshi sabavshvo leqsi leqsebi bavshvebistvis leqsebi patarebistvis
აისი ღამის დარაბებს აღებს,
სიცოცხლის ფერი მოჰყვება ივლისს.
_ სალამი ვარდით მოქარგულ ბაღებს,
_ სალამი მტკვარს და სალამი თბილისს!
ხეზე ჩიტები კვირტებად სხედან,
მივალ და ბაღის კარებს შევაღებ,
აი, მოხუცი გადახრილ ხესთან...
_ დილა მშვიდობის, ძია მებაღე!
ჩამოგვიქროლებს გოგონა ანცი,
ყვავილს ფუნთულა ხელებს შეახებს.
_ დილა მშვიდობის, პატარა გვანცა!
_ დილა მშვიდობის, ძია მებაღე!
მერე მთელი დღე ვარდებში დადის,
მზეს ემალება ბაღში თაკარას,
_ ძია მებაღე, მოვწყვიტო ვარდი?..
_ მოდი, მოწყვიტე, ჩემო პატარა.
დაისი ღამის დარაბებს კეტავს,
მზე უკანასკნელ სხივებს შეგვახებს
და ისმის ირგვლივ შრიალი ხეთა:
_ ღამე მშვიდობის, ძია მებაღე.