იოსებ დავითაშვილი - ქართველ ქალებს

ქართველნო ქალნო, იმხნევეთ,
გვარი არ წაგიხდენიათ;
მარად იშრომეთ ქართულად,
თქვენ ძველებს ვით უშრომიათ.
შვილები ზარდეთ მხნე, მშრომნი,
უყვარდეთ ქართველთ გვარია,
მამულის იყვნენ ერთგულნი,
როგორც ვაჟკაცის ვალია.
იზრუნეთ სიწმინდისათვის
და გაახილეთ თვალია,
შვილთ შთააგონეთ, რომ ქვეყნის
მათ აწევთ დიდი ვალია.
და ვინც უმტყუნოს მამულსა,
გაუწყრეს მაცხოვარია,
ვეღარ იხილოს განთიადს
ვარსკვლავი «ხარიპარია».
და ახლა თუ წყვდიადში ვართ,
შემდეგ გვინათდეს მთვარია,
დაგვიდგეს კაი ზაფხული,
ამწვანდეს მთა და ბარია.
აღარა დარჩეს სვავ-ყორანს
მშრომელის მონაგარია,
აგვშორდეს უსწავლელობა,
გაგვეღოს სიბრძნის კარია.

1880 წ. 3 იანვარი.
ქ. თბილისი