ნანა მეფარიშვილი - არა, რაღაც სიცოცხლეზე მეტი მინდა

“არა, რაღაც სიცოცხლეზე მეტი მინდა"!
სიყვარულიც ამიწიეთ მზესთან ახლოს..
ვაი, დღესაც შენს ძებნაში გამიწვიმდა,
მზის სხივს ვუცდი, გავშრე, არვინ დამინახოს.
მეჩვენება თუ სამყარო გაიფიცა,
ქარებს ვიხმობ და ფიქრებში ვმეორდები,
დეკემბერმა დღესაც ტყუილზე დამიფიცა,
ნუ სტირიო, მოვა, როცა ელოდები...
წუთი–სოფელს ვერ ვაკმარებ ამდენ განცდას,
მსურდა შენთან მევლო, სადმე ახლო–მახლოს,
მაპატიე საყვედური, მაინც დამცდა,
არ მსურს ნატვრა, უთქმელად რომ დამემარხოს.
შორს მივილტვი, დამეღალა ახლოს მზერა,
ცრემლიანი ვინმემ, რომ არ დამინახოს,
ვიდრე, ისევ მაიმედებს ბედისწერა,
სიყვარული ამიწიეთ მზესთან ახლოს.

ნანა მეფარიშვილი