ისე მომენატრე უკვე წლები არ მენახე თითქოს

ise momenatre ukve wlebi ar menaxe titkos
სიტყვებს ვერ ვინახავ უთქმელს,
თუმცა სხეულს ცრემლი მითოვს,
ისე მომენატრე უკვე
წლები არ მენახე თითქოს...
ბინდი გადამეკრა ძლეულს,
სევდა მეპარება ბეჩავს,
ეს რა დაგვემართა წლეულს,
სული უშენობას ღეჭავს...
წარსულს მოვინატრებ კრძალვით,
ფიქრებს შემოვარტყამ სარტყელს,
ეშმა მოგვეპარა მალვით,
უცხო სისადავით მამხელს...

სითბო შემოაკდა სხეულს,
გრძნობა მოვიხურო მინდა,
წყენას შემოხედე ნთხეულს
-იქნებ არაფრად არ ღირდა...

გულზე კაპილარებს მათლი,
სისხლმა მეც თავისი მიყო,
მე თუ ავაზაკად ჩამთვლი,
მინდა ქრისტეს მარჯვნივ ვიყო...

სიტყვებს ვერ ვინახავ უთქმელს,
თუმცა სხეულს ცრემლი მითოვს,
ისე მომენატრე უკვე
წლები არ მენახე თითქოს...