ხელი შემახე

ხელი შემახე... გაბედე და ხელი შემახე,
ვხედავ, ხელები როგორ გითრთის, როგორ ცახცახებს,
თითის წვერებში გტკივა სივრცე დღეს შენ ჩემამდე
და გულისცემით ზომავ მანძილს, ძნელად დასარღვევს.

ხელი შემახე, თორემ ძარღვებს, ლურჯად დაფეთქილს,
ხელის ზურგზე რომ დატოტილა უწყვეტ მდინარედ,
შენი სურვილი დააქვს სისხლით ურცხვად დაბერილს
და სადმე ვეღარ შეაკავებს ვნებას, მძინარეს.

ხელი შემახე... რაღას უცდი?! ხელი შემახე,
ხვალ იქნებ დრომ და ულმობელმა ბედმა გაგვყაროს,
ვიცი, ეს მე ვარ ახლა შენში თხემით ტერფამდე,
ერთი შეხება... და მოვწყდებით მყისვე სამყაროს.

ნ. ალადაშვილი