კაცმა ქალს აკოცა და საწოლზე მიაწვინა- ვიძაბები და თვალები მებრიცება,რადგან დედა თუ შემოვა აივნიდან, მე სხვა რამეზე უნდა გადავრთო ტელევიზორი.
ქალი კაცს თმაში უცურებს თითებს და თვალებს ხუჭავს. თვალებს ხუჭავს ისე, აი ნეტარებისგანო, რომ იტყვიან.
დედა დერეფნიდან მეძახის.
მე ტელევიზორს ვამუნჯებ და ლოყააწითლებული (შიშისგან რომ დედა შეიძლება მიმიხვდეს რას ვუყურებდი) გავდივარ აივანზე.
დედა სარეცხს ფენს.
-დიდი გოგო ხარ და რომ გათხოვდები, ხომ უნდა იცოდე როგორ იფინება სარეცხი, მოდი, დამიდექი გვერდზე და მიყურე.
(კაცს სახე არ უჩანდა, მხოლოდ ზურგი და განიერი, ძლიერი მხრები).
-ახლა თუ არ ისწავლე, მერე დედამთილი ხომ არ გეტყვის ეს ესე და ის ისეო.თექვსმეტი წლის გახდები სადაცაა და ჯერ სარეცხი არ გაგირეცხია თუ დაგიფენია.აი, შარვალს ასე გადმოატრიალებ მეორე მხარეს, რომ მზემ არ გაახუნოს გარეთა პირი.
(შარვალი ჯინსის ეცვა კაცს, უკან ორი ჯიბით, ზევიდან აჩეჩილი მაისური ჰქონდა გადმოგდებული, მომწონს მასე არეულად ჩაცმული კაცები, ჯინსებში და უბრალო მაისურებში).
-ყოველთვის ფეხებით დაკიდე შარვალი ქალისაც და კაცისაც. ამ შარვალს ეტყობა, რომ მამაშენისაა, ბოლოებს სულ ვაჭრი და ვუმოკლებ, მერე მაგასაც გასწავლი როგორ უნდა შეამოკლო ტოტები სიგრძეში თუ დაგჭირდა.
(ქალს ქერა თმები როგორ ჩამოეშალა და ყელი უკან როგორ გადააგდო. მერე ამ კაცმა როგორ მიაგდო საწოლზე ეს ქალი! რაღა დედამაც ახლა დამიძახა რა).
-აუცილებლად უნდა იცოდე საოჯახო საქმე, მეზობლები თუ შეგამჩნევენ რომ ატა-ბატა ფენ სარეცხს სალაპარაკო გახდები კიდეც.
გახედე, აგე მეექვსე სართულზე რა კარგადაა და სწორად ჩაყოლებული თეთრეული, მეოთხეზე კიდევ მარტოხელა ვანო თვითონ რეცხავს და ფენს, იმიტომაა ასე არეულ-დარეულად რომ უკიდია სარეცხი.
(ქალს ლამაზი თხელი თითები ჰქონდა, თმაში რომ შეუცურა კაცს. ნეტავ, მეც ლამაზი თითები მაქვს?)
-მიდი, კალათა აიღე და შევიდეთ ახლა შიგნით. ასე რას მიყურებ აწითლებული?
ხომ უნდა იცოდე სახლის საქმე?! სარეცხს რომ ავკრეფთ შენ დაგაუთოვებინებ.უცებ რომ გათხოვდე, არაფერი არ იცი! მერე გაჩვენებ როგორ იწმინდება ფანჯრის შუშებიც, ძმრიანი წყლით და გაზეთით. ასე დავიწყებთ და ნელ-ნელა ისწავლი ყველაფერს ამ ზაფხულის არდადეგებზე, აბა!
(დავიმახსოვრებ რომელ საათზე და არხზე გადის ესეთი ფილმები და ხვალ ხმაჩაწეულზე ვუყურებ, დედა სამსახურში რომ წავა).
×