ცხოვრება
მთელი ცხოვრება, ხომ ერთი პროცესია,
ერთი უცნაური ტრავერსი,
ჯერ დაბადება და მერე პროცესია,
სიკვდილთან შავი ალერსი.
მთელი ცხოვრება ხომ ერთი პროლოგია,
ერთი დიალოგის გავრცობა,
ყალბი პროფილების უმზეო ლოგია,
წარსულს გატნეული ბავშვობა.
მთელი ცხოვრება ხომ ერთი ზაფხულია,
ერთი სუსხიანი ზამთარი,
მსუყე შემოდგომის მწიფე მარხილია
და გაზაფხულია ამტყდარი.
მთელი ცხოვრება ხომ ერთი ტყუილია,
ერთი ცოდვიანი თამაში,
ხორცის ლხენაა და მძაფრი ყმუილია
სულის, დამწყვდეულის კარკასში.
მთელი ცხოვრება ხომ ერთი სტიქიაა,
თვალთა გულწრფელური სველება,
ზოგჯერ იღბალი და ზოგჯერ ბრმა ტყვიაა,
ბედის უცნაური გელვება.
მთელი ცხოვრება ხომ ჭრელი ბაზარია,
ურცხვი გამოფენა ნიღბების,
მიტოვებული და ღია ტაძარია,
კლუბებთან მდგარი რიგები.
მთელი ცხოვრება, ხომ ერთი პროცესია,
ერთი უცნაური ტრავერსი,
ჯერ დაბადება და მერე პროცესია,
სიკვდილთან შავი ალერსი...
* * *
ახლა მოდაშია რითმების გარეშე აკინძვა სტროფების,
ახლადმოდებულმა გრძნობებმა მე ლამის ძველებთან გამყარეს,
სადღაც ჩახვეულან ხავსიან სუროზე ალუჩის ყლორტები,
შარშანდელ ბარათებს სატრფოს, რომ უწერდი ნამუსი აჰყარეს.
ვიცი დაიბნევა წვიმის შემხედვარე სარკმელთან აპრილი
და ატმის ყვავილებს მარტის სასთუმალთან ცრემლივით დააწყობს,
შენ შეშინებული და მუდამ გაქრობის სურვილით დაღლილი,
სხვაგვარ სიყვარულს და სხვაგვარ ერთგულებას ძაღლივით დარაჯობ.
ახლა მოდაშია რითმების გარეშე აკინძვა სტროფების,
ახლახანს მარტი და გულჩვილი აპრილი ერთმანეთს გაჰყარეს,
სადღაც სიყვარული გამხდარა სამასხრო უზნეო ლოთების,
სადღაც ერთგულებას შენ რომ დარაჯობდი ნამუსი აჰყარეს.
ფუტკარაძე სოფიო - Putkaradze Sopio
⏱️ 1 წთ.
👁️ 3
100%