მამაკაცი გიტარით ხელში ქალისთვის უფრო მიმზიდველია. ამ დასკვნამდე მივიდნენ სამხრეთ ბრეტანის (საფრანგეთი) მეცნიერები. კვლევის შედეგები ჟურნალ Psychology of Music-ში გამოქვეყნდა.
კვლევაში 20 წლის მომხიბვლელი მამაკაცი და 300-მდე 18-დან 22 წლის ასაკის გოგონა მონაწილეობდა. მამაკაცი ქალებს ეცნობოდა და მათ ტელეფონის ნომრებს სთხოვდა.
გოგონები სამ ჯგუფად დაყვეს: პირველ შემთხვევაში მამაკაცს ხელში გიტარა ეჭირა, მეორე შემთხვევაში - სპორტული ჩანთა, მესამე შემთხვევაში კი ბიჭი გოგონებთან ცარიელი ხელებით მიდიოდა. მეცნიერებმა დაასკვნეს, რომ ”მუსიკოსი მამაკაცის” მიმზიდველობა გაცილებით მაღალია. მამაკაცს, რომელსაც ხელში გიტარა ეჭირა, ტელეფონის ნომერი გოგონების 31%-მა დაუტოვა, ხელცარიელს - 14%-მა, ხოლო სპორტული ჩანთით აღჭურვილს - 9%-მა.
შარშან მსგავსი კვლევა ისრაელში ჩატარდა. 100 სტუდენტ გოგონას ერთი და იგივე ადამიანი Facebook-ზე დამეგობრებას სთხოვდა. 100-დან 50 შემთხვევაში ფოტოზე გიტარიანი მამაკაცი იყო გამოსახული, დანარჩენ შემთხვევებში კი გიტარის გარეშე. "გიტარისტს" დამეგობრებაზე 50-დან 14 გოგონა დათანხმდა, გიტარის გარეშე მამაკაცს კი მხოლოდ 5.
მეცნიერთა თქმით, მუსიკა უძველესი საქორწინო რიტუალებიდან იღებს სათავეს და გამრავლებისთვის საჭირო პარტნიორის არჩევისას დღემდე მნიშვნელოვან როლს ასრულებს. გარდა ამისა, მუსიკალურ ინსტრუმენტზე დაკვრის უნარი შესაძლოა, ინტელექტუალურობასა და ადამიანის ფიზიკურ განვითარებაზე მიუთითებდეს.
2000 წელს გავრცელდა მოსაზრება, რომ
მუსიკალური შესაძლებლობები ტესტოსტერონის დონესთან არის დაკავშირებული. ვარაუდის თანახმად, ტესტოსტერონის მაღალი დონე თავის ტვინის მარჯვენა ნახევარსფეროს განვითარებას უწყობს ხელს, რომელიც ადამიანის მუსიკალურ შესაძლებლობებზე არის პასუხისმგებელი. ამგვარად, განვითარებული მუსიკალური ნიჭი შესაძლოა, ტესტოსტერონის მაღალ დონეზე და, შესაბამისად, განაყოფიერების შესაძლებლობაზე მიუთითებდეს.
რატომ მოსწონთ ქალებს მამაკაცები - გიტარით ხელში
⏱️ 1 წთ.
👁️ 2
100%