ირმა მალაციძე - გადარჩენა

გადარჩენა
irma malacidze - gadarchena
შეხედე
გახუნებია ყვითელი ვინსენტს...
დაშვებული აფრებივით
უღონოდ ჰკიდია იმედი ანძებს...
ჩემს უძირო ჩანთაში მიყრილ ნივთებში
გაბნეულა წუხანდელი სიზმარიც...
პაწია თითები იღებენ ტოკატოებს,
სათვალიდან იმზირებიან პაწაწა ეშმაკუნები
თიკოს თვალები...
სათამაშოდ იწვევენ სასოწარკვეთას.
მარწუხებივით ჩამფრენია
ორი მაშველი რგოლი,
და მიმათრევენ ნაპირისაკენ
თავგანწირვით...
რას შეამჩნევენ ოკეანეში
სულ რაღაც... ცრემლებს...
მლაშე მლაშეს ერევა
და ინთქმება თვალუწვდენელში.
არადა, რა ყვითელი ჰქონდა ვინსენტს...
მზემ თუ გაუხუნა ალბათ...