როგორ მინდა ვიცეკვო

rogor minda gecekvo leqsi cekva siyvaruli monatreba tango
როგორ მინდა ვიცეკვო
ისევ ძველი ტანგო,
სევდა გავინაპირო,
დავრჩე შენთან მარტო.

თმაში ვერცხლი იბრწყინებს
თვალისმომჭრელ სხივად,
აჟღერდება მუსიკა
სიყვარულის ჰიმნად,

აძგერდება გულები
და დაიწყებს თრთოლვას,
სიჭაბუკე გაფრინდა?
არა, ისევ ქროლავს.

კიდევ ერთხელ ვიცეკვებ
ტანგოს შენთან ერთად,
პაექრობას გავბედავ
თავად ცეკვის ღმერთთან.

მთვარე გაფერმკრთალდება,
თავს გადიქნევს ხვნეშით,
ღამე გაიპარება,
ჩაგვადნება ხელში.

ერთხელ კიდევ მაცეკვე
შენთან ერთად ტანგო. . .
მერე ისევ შევრჩები
მოგონებებს მარტოდ.