სიყვარული მონატრებას გადაეხვევა

აჰა, მივენდე გულის კარნახს, მოვედი შენთან,
თუმც გაპატიე, მაინც დამრჩა დარდი პატარა,
დღეს მარტოობა მონატრებას კარებთან შეხვდა,
გაუღიმა დამოწიწებით გამოატარა.
გადამახედე მოგონების ფანჯრიდან ისე,
აწმყოშიც ჩანდეს ანარეკლი ტკბილი წუთების,
ხვალინდელი დღე იმედებით ფიალას გვივსებს,
თქვი სადღეგრძელო, სიხარულო, რატომ ჩუმდები?!
ქარი აცეკვებს ხეივანს და თითქოს მაგონებს
პირველ უსაზღვრო მონატრებას, პირველ შეხებას,
გაითანდება შენი გული ამ ხმის გამგონე,
და სიყვარული მონატრებას გადაეხვევა.