ვასილ ივანეს ძე შუხაევი 1887 წელს დაიბადა. იგი კარგად არის ცნობილი ფართო საზოგადოებისთვის, როგორც თეატრალური მხატვარი, პროტესტანტი, პედაგოგი და რუსული კლასიკის ქმნილებების ილუსტრატორი, პირველ რიგში, როგორც პუშკინის შემოქმედების ერთ-ერთი საუკეთესო ილუსტრატორი. მხატვარმა ბევრი ყოფილი ემიგრანტის ბედი გაიზიარა, რომლებმაც სამშობლოში დაბრუნება გადაწყვიტეს და 1937 წელს მასობრივ დაპატიმრებაში მოხვდნენ.
საქართველოში შუხაევი მაგადანის გადასახლებიდან ჩამოვიდა და 1947 წლიდან თბილისში დასახლდა. მოგვიანებით იგი სამხატვრო აკადემიის პროფესორი გახდა. საქართველოში მის მიერ შექმნილი რიხტერის, ნეიჰაუზისა და ქართული კულტურის მოღვაწეთა პორტრეტები, ხელოვნების კლასიკადაა აღიარებული. განსაკუთრებულად ცნობილია “ფარჩისკაბიანი ქალბატონის ქორწილი”. 1962 წელს შუხაევს საქართველოს ხელოვნების დამსახურებული მოღვაწის წოდებაც მიენიჭა.
1920-იან წლებში ვასილ შუხაევი ბევრს მუშაობდა წიგნის გრაფიკაზე. 1928 წელს მან მხატვრულად გააფორმა ა. მიუსეს რომანი “ორი საყვარელი”. წიგნი პარიზში, გამომცემლობა La Pleiade-ში ფრანგულ ენაზე დაიბეჭდა.
გალერეა “კოპალაში” მხატვრის საიუბილეო თარიღთან დაკავშირებით ეროვნულ მუზეუმსა და კერძო კოლექციებში დაცული უძველესი ფერწერული ტილოები იქნა წარმოდგენილი. გამოფენილი იყო გრიგოლ აბაშიძის, ნატა ვაჩნაძის, სტალინისა და ალექსი მაჭავარიანის პორტრეტები; 1966 წელს შესრულებული “ნიუ ყვავილებით”, სადაც ნათლად არის გამოხატული ნეოკლასიციზმის ნიშნები – ხაზის გამომსახველობა, სხეულის ფორმათა შუქჩრდილოვანი მოდელირება და მკაფიო კონტური; 1964 წელს შექმნილი და ეროვნულ მუზეუმში დაცული “ნატაშა” – ჯუჯა ნატაშა, რომლის სახეც მხატვრის მიერ განსაკუთრებული თანაგრძნობითაა შესრულებული, ქალის თვალებში მისი ყოფის ტრაგედია, ფიზიკური და სულიერი ტკივილია გადმოცემული. სურათის კოლორისტული გადაწყვეტა და მოდელის ღრმა ფსიქოლოგიზმი, ამ პორტრეტს ვასილ შუხაევის საუკეთესო ნამუშევრების რიცხვს მიაკუთვნებს. მხატვრის დიდ შედევრად ითვლება 1916 წელს შესრულებული “კორნეტი ბარონი შპერლინგი”. ამ ციკლის ორმოცდაათზე მეტი ნახატი შესრულების ოსტატობით და გამოსახულ სახეთა დახასიათების ფსიქოლოგიზმით, რუსული ხელოვნების ოქროს ფონდს ეკუთვნის. შუხაევი თითქმის ყველა ფურცელზე აკეთებდა პიროვნების თვალის, მუნდირის, ქუდის ფერის ტექნიკური ხასიათის წარწერებს. ფერწერული სურათის შესაქმნელად დეტალების სიტყვიერი აღწერა, მხატვრისთვის აუცილებელი იყო. გარდა სურათებისა გამოფენაზე, ნ.ელიზბარაშვილის კოლექციაში დაცული შუხაევის ფოტოები, მის სახელზე გაცემული ვიზა და ჟურნალში გამოქვეყნებული ინტერვიუები იყო წარმოდგენილი. დიდი რუსი მხატვრის გამოფენა გალერეა “კოპალაში” 20 დღეს გასტანს.
აღსანიშნავია, რომ გასული წლის ივნისში ვასილ შუხაევის ზოგიერთი ნამუშევარი “კრისტის” აუქციონზე იქნა გამოფენილი, ხოლო ბალერინა ანა პავლოვას პორტრეტი 800 ათას ფუნტ სტერლინგად გაიყიდა.
შუხაევი ვასილი – Vasil Shukhaev
⏱️ 1 წთ.
👁️ 5
100%