თამარ ზუბიაშვილი - Tamar Zubiashvili

რაგვარ მწადია გადაბარგება

"ტატოს მერნიდან" "ლურჯა ცხენებზე".

ვერ ვედარბაზო გათამარებას,

გულს ავიძგერებ ჩემივ ხელებზე.

კუბოს ფიცარზე ნადუღი ცრემლი,

საფლავის ქვასთან ნაფურჩქნი ია,

ცხედართან მძიმე ხრიალი დედის,

პეიზაჟებად თვალებში მჩრია.

ვით სისხლს ვამპირი ვეწაფე მელანს,

მუზა შევკაზმე უყე რითმებით,

ბედი შუბივით კოცონზე მჭედავს,

რომ გააქარწყლოს ჩემი მიზნები.

უხიაგ ხრამში ხრიალებს ხალხი,

აქ ჩემი ჯვარი სხვებზე მცირეა,

ჯერ დამიბევეთ სუნთქვისთვის ჯანი,

ქედით საზიდი ქედზე მძიმეა.

მე დამნაშავედ თქვენ მზრდით მოყვრებო!

მერმე გულგრილად დამსაჯოთ გინდათ.

დაგემალებით, რომ ვერ მომძებნოთ,

თუ შემიფარებს მშობელი მიწა.